ملګرو ملتونو ويلي، د افغانستان د شمال ولايتونو اوسېدونکي حتی له وروستۍ زلزلې وړاندې هم له اوږدمهاله فقر، وچکالۍ او د بنسټيزو خدماتو له کمښت سره مخ وو.

د افغانستان لپاره د ښځو د ملګرو ملتونو اداره ويلي چې د دوشنبې شپې د زورورې زلزلې له رامنځته کېدو وروسته، د دې ادارې ښځينه مرستندوي ډلې له خپلو محلي همکارانو سره يو ځای د شمال زلزله‌ځپلو سيمو ته استول شوې دي، څو له ښځو او نجونو سره د ارزونې او مرستې چارې ترسره کړي.

د ملګرو ملتونو د ماشومانو د ملاتړ صندوق (یونیسف) استازي په افغانستان کې ويلي، د دې ادارې د مرستو ټیمونه د هېواد په شمال کې د زلزله‌ځپلو سيمو ته رسېدلي دي، څو له ماشومانو او اغېزمنو کورنيو سره مرسته وکړي.

د ۶.۳ ريښتر په کچه زلزلې د تېرې شپې (۱۲ لړم) په نيمه شپه د بلخ ولايت د خُلم ولسوالۍ ولړزوله چې له امله يې تر اوسه لږ تر لږه ۲۰ تنه مړه او له ۳۶۰ زيات نور ټپيان شوي دي.