د هرات په حلقوي سړک کې د هغې مرګونې ترافیکي پېښې په غبرګون کې چې لسګونه افغان مهاجر یې ووژل، نړیوالو سازمانونو لکه یونیسف او یوناما له قربانیانو سره د خواخوږۍ ترڅنګ ټینګار کړی چې د افغان مهاجرو بېرته ستنېدنه باید امن، له کرامته ډکه او داوطلبانه وي.

د طالبانو د ښځو ضد تګلارو په دوام، اوس د افغان نجونو دیني زده‌کړې هم ترې اخیستل کېږي. د العربیه تلویزیوني شبکې د چهارشنبې په ورځ (۲۹ زمری) راپور ورکړی چې هبت‌الله اخندزاده، د طالبانو مشر، د دیني مدرسو لپاره د نجونو د نوم‌لیکنې د تدریجي بندېدو امر کړی دی.

په هرات ولایت کې د یوې خونړۍ ترافیکي پېښې په ترڅ کې لږ تر لږه ۷۹ تنه، چې ۱۹ ماشومان هم پکې شامل دي، خپل ژوند له لاسه ورکړی دی. دا قربانیان زیاتره هغه مهاجرین دي چې له ایرانه تازه بېرته ستانه شوي وو.

د ملګرو ملتونو د ښځو څانګې خبرداری ورکړی چې څلور کاله وروسته له هغې چې طالبان بېرته واک ته ورسېدل، د افغانستان ښځې او نجونې له خپلو بنسټیزو حقونو بې‌برخې پاتې شوې دي؛ محرومیت چې پایلې یې د هغوی پر روغتیا، زده‌کړو او امنیت باندې سخت اغېز لري.