د پاکستان د ولسمشر ویاند مرتضی سولنګي د افغان ښځو او نجونو پر وړاندې د طالبانو پر محدودیتونو نیوکه کړې ده. هغه ویلي، طالبان له پاکستان سره د کړکېچ په زیاتولو هڅه کوي چې د افغانستان له کورنیو ستونزو د خلکو پام واړوي.

د ازبیکستان د ولسمشرۍ ادارې مشرې سعیده میرضیایف له نړیوالې ټولنې غوښتي چې د افغانستان خلک له خپلو ستونزو سره یوازې پرېنږدي. هغې ویلي، افغانستان ته یوازې د ګواښ د سرچینې په سترګه کتل د ستونزو حل نه دی.

د پاکستان او طالبانو ترمنځ د کړکېچ له زیاتېدو سره، ذبیح‌الله مجاهد ویلي چې د کندهار، پکتیا او خوست پر ولایتونو د پاکستان په هوايي بریدونو کې څلور ملکي وګړي وژل شوي دي. اسلام‌اباد وايي چې لس پوځي ځایونه یې په نښه کړي دي.

د «بد ورکولو» دود لا هم د افغانستان په ځینو سیمو کې د ښځو او نجونو ژوند اغېزمنوي. شیرین او زینب وايي، د خپلو کورنیو د نارینه‌وو د جرمونو له امله جبري ودونو ته اړ ایستل شوې دي.