په هرات کې یوه نهه کلنه د دستمالونو پلورونکې نجلۍ وايي، د طالبانو ځواکونو د سړک پر غاړه د کار پر مهال څو ځله نیولې ده، په داسې حال کې چې کورنۍ یې له ایران څخه تر راستنېدو وروسته له بېکارۍ او اقتصادي ستونزو سره مخ ده.

د روغتیا نړیوال سازمان (WHO) اعلان کړی چې د روان میلادي کال په جولای میاشت کې په افغانستان کې د سینه‌بغل اړوند ۱۹۸ مړینې ثبت شوې دي.

د افغانستان د ښځو د حرکت شبکې د طالبانو تر واکمنۍ لاندې له افغانستان سره د ډیپلوماسۍ او اړیکو د اړتیا په اړه د عایشه وهاب دریځ غندلی او وایي، د ښځو د حقونو د ځپلو په شرایطو کې د رسمي اړیکو پر لور حرکت د طالبانو د عادي کولو لامل کېږي.

د سیویکوس مانیتور بنسټ په خپله تازه ارزونه کې ویلي چې په افغانستان کې معترضو ښځو د پېژندل کېدو د خطر د کمولو لپاره خپل اعتراضونه کورونو او تړلو ځایونو ته انتقال کړي دي، خو دغه واړه او پټ اعتراضونه هم هغوی د څار، خپلسرو نیونو او تاوتریخوالي له خطر سره مخ کوي.