د ښځو د حرکت شبکې له پاکستانه د افغانستان د پناه غوښتونکو جبري ایستل غندلي او د دې بهیر پر وړاندې یې د نړیوالې ټولنې پر چوپتیا او بې‌عملۍ نیوکه کړې ده. دغې شبکې ویلي، ښځې، خبریالان، مدني فعالان او نور له خطر سره مخ کسان د پاکستان او طالبانو ترمنځ د سیاسي ترینګلتیا بیه پرې کوي.

د ۲۰۲۱ کال د اګست له ۱۵مې تر نن ورځې پنځه کاله کېږي چې طالبانو د خپلو فرمانونو په صادرولو سره د قومي او مذهبي اقلیتونو، ښځو او نارینه‌وو عادي ژوند درولی دی.

په افغانستان کې د ملګرو ملتونو مرستندویه پلاوی (یوناما) وایي، پر ښځو او نجونو د طالبانو سختو محدودیتونو ژورې ټولنیزې او اقتصادي پایلې لرلې او په افغانستان کې د نړیوال تعامل او پانګونې د پراختیا پر وړاندې په یوه اصلي خنډ بدل شوي دي.

د افغانستان د رسنیو د ملاتړ سازمان (AMSO) وایي، د طالبانو د پنځه کلنې واکمنۍ پر مهال د افغانستان رسنیز چاپېریال سخت محدود شوی او له ۸۰ سلنې ډېرې ښځینه خبریالانې له رسمي رسنیز فعالیت څخه وتلې دي.