د طالبانو د امر بالمعروف او نهي عن المنکر وزارت ادعا کړې چې د افغانستان په اوو ولایتونو کې یې د ۳۳ ښځو کورنیو شکایتونو ته رسېدنه کړې ده. خو دغه وزارت د شکایتونو د څرنګوالي، د قضیو د څېړنې او د یادو ښځو د اوسني وضعیت په اړه نور جزئیات نه دي ورکړي.

د ملګرو ملتونو د ښځو پر وړاندې د تبعیض د له منځه وړلو کمېټې ویلي چې مصنوعي ځیرکتیا کولای شي جنسیتي کلیشې پیاوړې کړي او د ښځو او نجونو پر وړاندې د تاوتریخوالي نوې بڼې رامنځته کړي. دې کمېټې له دولتونو غوښتي چې پر ډیجیټلي ټکنالوژیو څارنه زیاته کړي.

د یوناما مشرې رباب فاطمې د ملګرو ملتونو د جوړېدو د ۸۱مې کلیزې په مناسبت د افغانستان له خلکو د دې سازمان پر دوامدار ملاتړ ټینګار کړی او ویلي یې دي چې د هېواد راتلونکی د افغانانو دی.

یونیسف په افغانستان کې د اوبو د بحران د زیاتېدو خبر ورکړی او ویلي یې دي چې دغه وضعیت د ماشومانو او سیمه‌ییزو ټولنو پر ژوند اغېز کوي.