په ملګرو ملتونو کې د افغانستان د دایمي استازولۍ سرپرست نصیراحمد فایق د نړیوالو مرستو د دوام، د ښځو او نجونو د حقونو د ملاتړ او د هېواد د راتلونکي په ټاکلو کې د افغانانو د مانادار ګډون غوښتنه کړې ده.

د غزني ولایت په اجرستان ولسوالۍ کې یو څلور کلن ماشوم د خپل کور ترڅنګ د لوبو پر مهال د اوبو ډنډ ته لوېدلی او ژوند یې له لاسه ورکړی دی. طالبانو دا پېښه تایید کړې ده.

سیمه‌ییزو سرچینو خبر ورکړی چې د یوې نجلۍ په ګډون درې کسان د پکتیکا او ننګرهار ولایتونو په درېیو جلا پېښو کې وژل شوي دي. د دغو پېښو عاملین تر اوسه نه دي پېژندل شوي.

د ملګرو ملتونو د ښځو څانګه وايي، چې په ۲۰۲۶ کال کې په ټوله نړۍ کې شاوخوا ۴۲۶ میلیونه ښځې او نجونې په سخته بېوزلۍ کې ژوند کوي. دې ادارې د ښځو او نجونو لپاره د زده‌کړو، روغتیايي خدمتونو او ټولنیز ملاتړ په برخو کې د لا ډېرې پانګونې غوښتنه کړې ده.