اوچا وايي، د طالبانو لاسوهنې، د ښځو پر کار محدودیتونو او د بودجې کمښت په افغانستان کې د مرستو رسولو بهیر ستونزمن کړی دی. د دې ادارې د راپور له مخې، په ۲۳۷ ولسوالیو کې مرستندویه بنسټونه له منځنیو یا سختو محدودیتونو سره مخ وو.

د پاکستان د ولسمشر ویاند مرتضی سولنګي د افغان ښځو او نجونو پر وړاندې د طالبانو پر محدودیتونو نیوکه کړې ده. هغه ویلي، طالبان له پاکستان سره د کړکېچ په زیاتولو هڅه کوي چې د افغانستان له کورنیو ستونزو د خلکو پام واړوي.

د ازبیکستان د ولسمشرۍ ادارې مشرې سعیده میرضیایف له نړیوالې ټولنې غوښتي چې د افغانستان خلک له خپلو ستونزو سره یوازې پرېنږدي. هغې ویلي، افغانستان ته یوازې د ګواښ د سرچینې په سترګه کتل د ستونزو حل نه دی.

د پاکستان او طالبانو ترمنځ د کړکېچ له زیاتېدو سره، ذبیح‌الله مجاهد ویلي چې د کندهار، پکتیا او خوست پر ولایتونو د پاکستان په هوايي بریدونو کې څلور ملکي وګړي وژل شوي دي. اسلام‌اباد وايي چې لس پوځي ځایونه یې په نښه کړي دي.